Замест жыцьцярысу

я той хто сьпіць на вышыні дзявятага паверха

я той хто сочыць за чаінкамі ў празрыстым кубку

я той хто на плячах сваіх зьбірае перхаць

я той хто з тэлефона не здымае трубку

я той хто езьдзіць на работу пад зямлёю

я той хто ўвечары адкідвае шмат ценяў

я той хто ходзіць ноччу гаварыць з ракою

я той хто фарбу злушчвае з пад’езных сьценаў

я той хто кожны дзень стаіць па ежу ў краме

я той хто слухае купаньне ветру ў вецьці

я той хто адбіваецца у лужах пад нагамі

я той хто зьнікне ў падваротні сьмерці

я той хто насяляе спальныя раёны

я той хто не знаходзіць сабе месца

я той хто углядаецца у змрок аконны

я той хто хоча зоркамі сагрэцца